ਨੌਜਵਾਨ ਆਪਣੀਆਂ ਜੜ੍ਹਾਂ ਨਾਲ ਜੁੜਨ ਤਾਂ ਹੀ ਬਣਨਗੇ ਭਾਰਤ ਪੁੱਤਰ ਤੇ ਭਾਰਤ ਬਣੇਗਾ ਵਿਸ਼ਵ ਗੁਰੂ – ਡਾ.ਅਮਿਤ ਕਾਂਸਲ
ਡਾ. ਅਮਿਤ ਕਾਂਸਲ ਮੁੱਖ ਮਹਿਮਾਨ ਵਜੋਂ ਵਿਦਿਆਰਥੀਆਂ ਨੂੰ ਸੰਬੋਧਿਤ ਕਰਦੇ ਹੋਏ
ਸੰਤ ਲੋਗਵਾਲ ਇੰਜਨੀਅਰਿੰਗ ਇੰਸਟੀਚਿਊਟ ਆਫ਼ ਟੈਕਨਾਲੋਜੀ (ਸਲਾਇਟ) ਵਿਖੇ ਨਵ ਸੰਵਤ 2082 ਸਾਲ ਪ੍ਰਤੀਪਦਾ ਦੇ ਸ਼ੁਭ ਮੌਕੇ ਵਿਸ਼ਵਿਕ ਮੰਚ ‘ਤੇ ਭਾਰਤੀ ਵਿਗਿਆਨ ਦੇ ਅਮੁੱਲ ਯੋਗਦਾਨ ਵਿਸ਼ੇ ਤੇ ਆਯੋਜਿਤ ਕਾਰਜਕ੍ਰਮ ਵਿੱਚ ਸਮਾਜ ਸੇਵਾ ਵਿੱਚ ਮੋਢੀ ਸੰਸਥਾ ਕਾਂਸਲ ਫਾਊਂਡੇਸ਼ਨ ਦੇ ਸੰਸਥਾਪਕ ਰਾਸ਼ਟਰਵਾਦੀ ਸਿੱਖਿਆ ਸ਼ਾਸਤਰੀ ਅਤੇ ਐੱਨ.ਐੱਚ.ਪੀ.ਸੀ., ਬਿਜਲੀ ਮੰਤਰਾਲੇ ਭਾਰਤ ਸਰਕਾਰ ਦੇ ਸਾਬਕਾ ਨਿਰਦੇਸ਼ਕ ਡਾ ਅਮਿਤ ਕਾਂਸਲ ਮੁੱਖ ਮਹਿਮਾਨ, ਰਾਸ਼ਟਰੀ ਸਵੈਮ ਸੇਵਕ ਸੰਘ ਦੇ ਪ੍ਰਾਂਤ ਪ੍ਰਚਾਰ ਪ੍ਰਮੁੱਖ ਅਜੇ ਜੀ ਮੁੱਖ ਬੁਲਾਰੇ ਵਜੋਂ ਅਤੇ ਜ਼ਿਲ੍ਹਾ ਪ੍ਰਚਾਰਕ ਕੁਲਦੀਪ ਜੀ ਵਿਸ਼ੇਸ਼ ਮਹਿਮਾਨ ਵਜੋਂ ਹਾਜ਼ਰ ਹੋਏ। ਪ੍ਰਬੰਧਕਾਂ ਅਤੇ ਵਿਦਿਆਰਥੀਆਂ ਵੱਲੋਂ ਉਨ੍ਹਾਂ ਦਾ ਭਾਰਤੀ ਰੀਤੀ ਰਿਵਾਜ ਅਨੁਸਾਰ ਸ਼ਾਨਦਾਰ ਸਵਾਗਤ ਕੀਤਾ ਗਿਆ।
ਇਸ ਮੌਕੇ ਮੁੱਖ ਮਹਿਮਾਨ ਵਜੋਂ ਵਿਚਾਰ ਰੱਖਦੇ ਹੋਏ ਡਾ ਅਮਿਤ ਕਾਂਸਲ ਨੇ ਕਿਹਾ ਕਿ ਅਸੀਂ ਕੋਈ ਵੀ ਤਿਉਹਾਰ ਇਤਿਹਾਸ ਦੀਆਂ ਮਹਾਨ ਘਟਨਾਵਾਂ ਨੂੰ ਯਾਦ ਕਰਨ ਅਤੇ ਉਨ੍ਹਾਂ ਨੂੰ ਆਪਣੇ ਜੀਵਨ ਵਿਚ ਧਾਰਨ ਕਰਨ ਲਈ ਮਨਾਉਂਦੇ ਹਾਂ ਇਸ ਲੜੀ ਵਿੱਚ ਅਸੀਂ ਭਾਰਤੀ ਨਵੇਂ ਸਾਲ ਨੂੰ ਚੈਤਰ ਸ਼ੁਕਲ ਪ੍ਰਤੀਪਦਾ ਦੇ ਰੂਪ ਵਿੱਚ ਮਨਾਉਂਦੇ ਹਾਂ ਕਿਉਂਕਿ ਇਸ ਦਿਨ ਚੱਕਰਵਰਤੀ ਸਮਰਾਟ ਵਿਕਰਮਾਦਿਤਯ ਨੇ ਸ਼ਕਾਂ ਨੂੰ ਹਰਾਇਆ ਅਤੇ ਭਾਰਤ ਵਿੱਚ ਉਨ੍ਹਾਂ ਦੇ ਆਤੰਕ ਨੂੰ ਖਤਮ ਕੀਤਾ ਅਤੇ ਵਿਕਰਮ ਸੰਵਤ ਦੀ ਸ਼ੁਰੂਆਤ ਕੀਤੀ। ਇਹ ਉਹ ਦਿਨ ਹੈ ਜਦੋਂ ਬ੍ਰਹਮਾ ਜੀ ਨੇ ਬ੍ਰਹਿਮੰਡ ਦੀ ਰਚਨਾ ਕੀਤੀ ਸੀ ਅਤੇ ਇਸ ਦਿਨ ਹੀ ਰਾਸ਼ਟਰੀ ਸਵੈਮ ਸੇਵਕ ਸੰਘ ਦੇ ਸੰਸਥਾਪਕ ਡਾ ਕੇਸ਼ਵ ਰਾਓ ਬਲੀਰਾਮ ਹੇਡਗੇਵਾਰ ਜੀ ਦਾ ਜਨਮ ਹੋਇਆ ਸੀ। ਡਾ. ਹੇਡਗੇਵਾਰ ਨੇ ਸੰਕਲਪ ਲਿਆ ਸੀ ਕਿ ਉਹ ਇੱਕ ਗੁਣ ਸੰਪੰਨ ਰਾਸ਼ਟਰ ਪ੍ਰੇਮੀ ਸੰਗਠਿਤ ਸਮਾਜ ਦੀ ਉਸਾਰੀ ਕਰਨਗੇ ਨਵਾਂ ਸਾਲ ਸੰਕਲਪ ਲੈਣ ਦਾ ਦਿਨ ਹੈ ਇਸ ਲਈ ਸਾਰੇ ਨੌਜਵਾਨਾਂ ਨੂੰ ਭਾਰਤ ਦੀ ਆਨ ਸ਼ਾਨ ਨੂੰ ਉੱਚਾ ਚੁੱਕਣ ਲਈ ਕਾਰਜ ਕਰਨ ਦਾ ਸੰਕਲਪ ਲੈਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਨੌਜਵਾਨਾਂ ਨੂੰ ਆਪਣੀਆਂ ਜੜ੍ਹਾਂ ਨਾਲ ਜੁੜਨਾ ਚਾਹੀਦਾ ਹੈ ਤਾਂ ਹੀ ਉਹ ਸੱਚਮੁੱਚ ਭਾਰਤ ਦੇ ਪੁੱਤਰ ਬਣਨਗੇ ਅਤੇ ਤਦ ਹੀ ਉਨ੍ਹਾਂ ਨੂੰ ਪਤਾ ਲੱਗੇਗਾ ਕਿ ਉਹ ਅਸਲ ਵਿੱਚ ਕੀ ਹਨ।
ਵਿਸ਼ਵ ਵਿੱਚ ਭਾਰਤ ਦੇ ਯੋਗਦਾਨ ਬਾਰੇ ਦੱਸਦਿਆਂ ਉਨ੍ਹਾਂ ਕਿਹਾ ਕਿ ਭਾਰਤ ਨੇ ਮੁੱਖ ਤੌਰ ’ਤੇ ਯੋਗ ਆਯੁਰਵੇਦ ਅਤੇ ਵੇਦਾਂਤ ਪੂਰੀ ਦੁਨੀਆਂ ਨੂੰ ਪ੍ਰਦਾਨ ਕੀਤਾ ਅੱਜ ਪੂਰੀ ਦੁਨੀਆ ਨੇ ਯੋਗ ਅਤੇ ਆਯੁਰਵੇਦ ਨੂੰ ਕਿਸੇ ਨਾ ਕਿਸੇ ਰੂਪ ਵਿੱਚ ਆਪਣੀ ਜੀਵਨ ਸ਼ੈਲੀ ਦਾ ਹਿੱਸਾ ਬਣਾ ਲਿਆ ਹੈ। ਭਾਰਤੀ ਸਭਿਅਤਾ ਵਸੁਧੈਵ ਕੁਟੁੰਬਕਮ ਦੇ ਸਿਧਾਂਤ ‘ਤੇ ਅਧਾਰਤ ਹੈ ਜੋ ਸਮੁੱਚੀ ਧਰਤੀ, ਕੁਦਰਤ, ਜਾਨਵਰਾਂ, ਸਾਰੇ ਮਨੁੱਖਾਂ ਨੂੰ ਇੱਕ ਪਰਿਵਾਰ ਮੰਨਦੀ ਹੈ।
ਡਾ: ਕਾਂਸਲ ਨੇ ਕਿਹਾ ਕਿ ਭਾਰਤੀ ਸੰਸਕ੍ਰਿਤੀ ਦੇ ਕੁਝ ਸਥਾਪਿਤ ਨਿਯਮ ਹਨ ਜੋ ਸੰਜਮ ਅਤੇ ਸ਼ਰਧਾ ‘ਤੇ ਆਧਾਰਿਤ ਹਨ। ਉਨ੍ਹਾਂ ਕਿਹਾ ਕਿ ਆਰ ਐਸ ਐਸ ਦੇ ਸਰਸੰਘਚਾਲਕ ਡਾ: ਮੋਹਨ ਭਾਗਵਤ ਨੇ ਪੰਜ ਪਰਿਵਰਤਨ ਦਾ ਸਿਧਾਂਤ ਦਿੱਤਾ ਹੈ ਜਿਸ ਵਿੱਚ ਸਮਾਜਿਕ ਸਦਭਾਵਨਾ, ਸਵਦੇਸ਼ੀ, ਪਰਿਵਾਰ ਪਰਬੋਧਨ, ਵਾਤਾਵਰਣ ਦੀ ਸੁਰੱਖਿਆ ਅਤੇ ਨਾਗਰਿਕ ਨਿਯਮਾਂ ਦੀ ਪਾਲਣਾ ਮੁੱਖ ਹਨ। ਸਾਰੇ ਨੌਜਵਾਨਾਂ ਨੂੰ ਇਨ੍ਹਾਂ ਪੰਜਾਂ ਸਿਧਾਂਤਾਂ ਨੂੰ ਆਪਣੇ ਜੀਵਨ ਵਿੱਚ ਅਪਨਾਉਣਾ ਚਾਹੀਦਾ ਹੈ ਕਿਉਂਕਿ ਜਿਸ ਤਰ੍ਹਾਂ ਦਾ ਸਮਾਜ ਅਸੀਂ ਚਾਹੁੰਦੇ ਹਾਂ, ਉਸ ਤਰ੍ਹਾਂ ਦਾ ਸਮਾਜ ਬਣਾਉਣ ਤੋਂ ਪਹਿਲਾਂ ਸਾਨੂੰ ਆਪਣੇ ਆਪ ਨੂੰ ਉਸੇ ਤਰ੍ਹਾਂ ਬਣਾਉਣਾ ਪਵੇਗਾ ਅਤੇ ਸੰਘ ਵਿਅਕਤੀ ਨਿਰਮਾਣ ਰਾਹੀਂ ਰਾਸ਼ਟਰ ਨਿਰਮਾਣ ਦੇ ਕੰਮ ਵਿੱਚ ਲੱਗਾ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਭਾਰਤ ਦੇ ਹਰ ਨੌਜਵਾਨ ਲਈ ਇਹ ਤੱਥ ਕੌਮੀ ਮਾਣ ਦੀ ਭਾਵਨਾ ਪੈਦਾ ਕਰਦਾ ਹੈ ਕਿ ਜਦੋਂ ਭਾਰਤ ਦੀ ਪੁਲਾੜ ਏਜੰਸੀ ਇਸਰੋ ਪੁਲਾੜ ਵਿੱਚ ਕੋਈ ਉਪਗ੍ਰਹਿ ਜਾਂ ਕੋਈ ਖੋਜ ਕਰਦੀ ਹੈ ਤਾਂ ਉਸ ਵਿੱਚ ਕਿਸੇ ਵਿਦੇਸ਼ੀ ਦੀ ਸ਼ਮੂਲੀਅਤ ਨਹੀਂ ਹੁੰਦੀ ਇਹ ਪੂਰੀ ਤਰ੍ਹਾਂ ਭਾਰਤੀ ਵਿਗਿਆਨੀਆਂ ਵੱਲੋਂ ਚਲਾਈ ਜਾਂਦੀ ਹੈ ਪਰ ਅਮਰੀਕਾ ਦੀ ਪੁਲਾੜ ਏਜੰਸੀ ਨਾਸਾ ਕੋਲ ਸੈਂਕੜੇ ਵਿਗਿਆਨੀ ਹਨ ਜੋ ਭਾਰਤੀ ਹਨ। ਯਕੀਨਨ ਭਾਰਤੀ ਵਿਗਿਆਨ, ਖੋਜ ਅਤੇ ਭਾਰਤੀਆਂ ਦੀ ਸਮਰੱਥਾ ਦਾ ਕੋਈ ਜਵਾਬ ਨਹੀਂ ਹੈ।
ਇਸ ਮੌਕੇ ਰਾਸ਼ਟਰੀ ਸਵੈਮ ਸੇਵਕ ਸੰਘ ਦੇ ਪ੍ਰਾਂਤ ਪ੍ਰਚਾਰ ਪ੍ਰਮੁੱਖ ਅਜੈ ਜੀ ਨੇ ਮੁੱਖ ਬੁਲਾਰੇ ਵਜੋਂ ਵਿਦਿਆਰਥੀਆਂ ਨੂੰ ਵਿਸ਼ਵਿਕ ਮੰਚ ‘ਤੇ ਭਾਰਤੀ ਵਿਗਿਆਨ ਦੇ ਵਡਮੁੱਲੇ ਯੋਗਦਾਨ ਬਾਰੇ ਤਰਕਸੰਗਤ ਜਾਣਕਾਰੀ ਦਿੱਤੀ। ਉਨ੍ਹਾਂ ਕਿਹਾ ਕਿ ਪ੍ਰਾਚੀਨ ਕਾਲ ਤੋਂ ਹੀ ਭਾਰਤ ਨੇ ਮੈਡੀਕਲ ਵਿਗਿਆਨ,ਯੋਗਾ, ਰਸਾਇਣ ਵਿਗਿਆਨ, ਭਾਸ਼ਾ ਵਿਗਿਆਨ, ਖੇਤੀਬਾੜੀ ਵਿਗਿਆਨ, ਭੌਤਿਕ ਵਿਗਿਆਨ, ਖਗੋਲ ਅਤੇ ਗਣਿਤ ਦੇ ਖੇਤਰਾਂ ਵਿੱਚ ਵਿਸ਼ਵ ਭਰ ਵਿੱਚ ਅਮੁੱਲ ਯੋਗਦਾਨ ਪਾਇਆ ਹੈ। ਭਾਰਤ ਦੀ ਪਵਿੱਤਰ ਧਰਤੀ ‘ਤੇ ਜਨਮ ਲੈਣ ਵਾਲੇ ਮਹਾਰਿਸ਼ੀ ਸੁਸ਼ਰੁਤ, ਪਤੰਜਲੀ, ਚਰਕ, ਪਾਣਿਨੀ, ਆਰੀਆਭੱਟ ਵਰਗੇ ਮਹਾਨ ਵਿਗਿਆਨੀਆਂ ਦੀ ਲੰਮੀ ਲੜੀ ਹੈ। ਮੌਜੂਦਾ ਸਮੇਂ ਵਿਚ ਵੀ ਭਾਰਤ ਪੁਲਾੜ, ਸੁਰੱਖਿਆ, ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਆਦਿ ਵੱਖ-ਵੱਖ ਖੇਤਰਾਂ ਵਿਚ ਵਿਸ਼ਵ ਪੱਧਰ ‘ਤੇ ਵਡਮੁੱਲਾ ਯੋਗਦਾਨ ਪਾ ਰਿਹਾ ਹੈ ਸੰਕਟ ਦੀ ਸਥਿਤੀ ਵਿਚ ਪੂਰੀ ਦੁਨੀਆ ਨੇ ਭਾਰਤ ਵੱਲ ਦੇਖਿਆ ਹੈ ਅਤੇ ਨਿਸ਼ਚਿਤ ਤੌਰ ‘ਤੇ ਉਹ ਸਮਾਂ ਦੂਰ ਨਹੀਂ ਜਦੋਂ ਭਾਰਤ ਆਪਣੇ ਅਥਾਹ ਗਿਆਨ, ਵਿਗਿਆਨ ਅਤੇ ਅਮੀਰ ਸੱਭਿਆਚਾਰਕ ਵਿਰਸੇ ਕਾਰਨ ਵਿਸ਼ਵ ਗੁਰੂ ਦੇ ਅਹੁਦੇ ‘ਤੇ ਬਿਰਾਜਮਾਨ ਹੋਵੇਗਾ।
ਪ੍ਰੋਫੈਸਰ ਆਰ ਕੇ ਸਕਸੈਨਾ ਨੇ ਸਾਰੇ ਮਹਿਮਾਨਾਂ ਦਾ ਆਦਰ ਸਤਿਕਾਰ ਕਰਦੇ ਹੋਏ ਜੀ ਆਇਆ ਕਿਹਾ। ਇਸ ਮੌਕੇ ਵਿਸ਼ੇਸ਼ ਤੌਰ ‘ਤੇ ਪ੍ਰੋ: ਪ੍ਰਦੁਮਣ ਕੁਮਾਰ, ਡਾ: ਹੇਮੰਤ ਕੁਮਾਰ, ਮਨੋਜ ਪਾਂਡੇ ਅਤੇ ਪ੍ਰੋਗਰਾਮ ਕੋਆਰਡੀਨੇਟਰ ਰਿਸਰਚ ਸਕਾਲਰ ਮਹਿੰਦਰ ਸਿੰਘ, ਸ਼ਿਵਮ ਪਾਂਡੇ, ਰਵੀ ਕੁਮਾਰ ਝਾ ਸਹਿਤ ਵੱਡੀ ਗਿਣਤੀ ਵਿੱਚ ਵਿਦਿਆਰਥੀ ਨੇ ਹਿੱਸਾ ਲਿਆ।
About The Author
