ਮਜ਼ਬੂਤ ਇਰਾਦੇ ਤੇ ਲਗਨ ਨਾਲ ਗੁਰਜੰਟ ਸਿੰਘ ਨੇ ਹਾਸਲ ਕੀਤੀ ਕਾਮਯਾਬੀ
ਬਰਨਾਲਾ- 9ਅਪ੍ਰੈਲ(ਰਾਕੇਸ਼ ਜੇਠੀ)- ਬਰਨਾਲਾ ਦੇ ਇੱਕ ਸਧਾਰਣ ਮੱਧਵਰਗੀ ਪਰਿਵਾਰ ਨਾਲ ਸਬੰਧਤ ਨੌਜਵਾਨ ਗੁਰਜੰਟ ਸਿੰਘ ਨੇ ਸਾਬਤ ਕਰ ਦਿੱਤਾ ਕਿ ਜੇ ਮਨ ਵਿੱਚ ਲਗਨ ਹੋਵੇ ਤੇ ਹੌਸਲਾ ਕਦੇ ਨਾ ਟੁੱਟੇ, ਤਾਂ ਕੋਈ ਵੀ ਮੰਜ਼ਿਲ ਦੂਰ ਨਹੀਂ ਰਹਿੰਦੀ। ਬਚਪਨ ਤੋਂ ਹੀ ਅਧਿਆਪਕ ਬਣਨ ਦਾ ਸੁਪਨਾ ਦੇਖਣ ਵਾਲੇ ਗੁਰਜੰਟ ਸਿੰਘ ਦਾ ਜੀਵਨ ਸੰਘਰਸ਼ ਅਤੇ ਮਿਹਨਤ ਦੀ ਇਕ ਜੀਵੰਤ ਮਿਸਾਲ ਹੈ।
ਮੁੱਢਲੀ ਪੜ੍ਹਾਈ ਪੂਰੀ ਕਰਨ ਤੋਂ ਬਾਅਦ ਉਨ੍ਹਾਂ ਨੇ ਪ੍ਰਾਇਮਰੀ ਅਧਿਆਪਕ ਬਣਨ ਲਈ ਕਾਫੀ ਜੱਦੋਜਹਿਦ ਕੀਤੀ। ਉਸ ਸਮੇਂ ਈ.ਟੀ.ਟੀ. ਦੀ ਪ੍ਰੀਖਿਆ ਪਾਸ ਕਰਕੇ ਹੀ ਡਾਇਟ ਵਿੱਚ ਦਾਖਲਾ ਮਿਲਦਾ ਸੀ। ਗੁਰਜੰਟ ਸਿੰਘ ਨੇ ਬਾਹਰਲੇ ਜ਼ਿਲਿਆਂ ਵਿੱਚ ਜਾ ਕੇ, ਇੱਥੋਂ ਤੱਕ ਕਿ ਅੰਮ੍ਰਿਤਸਰ ਵਿਖੇ ਵੀ ਪ੍ਰੀਖਿਆ ਦਿੱਤੀ, ਪਰ ਸਫਲਤਾ ਹਾਸਲ ਨਾ ਹੋ ਸਕੀ। ਪਰ ਉਨ੍ਹਾਂ ਨੇ ਕਦੇ ਵੀ ਹੌਸਲਾ ਨਹੀਂ ਹਾਰਿਆ।
ਇਸ ਦੌਰਾਨ ਉਨ੍ਹਾਂ ਨੇ ਆਪਣੀ ਰੁਚੀ ਅਨੁਸਾਰ ਲੱਕੜੀ ਦੇ ਕੰਮ ਨਾਲ ਜੁੜਿਆ ਕਾਰਪੈਂਟਰ ਕੋਰਸ ਅਤੇ ਅਪਰੈਂਟਿਸ ਟ੍ਰੇਨਿੰਗ ਹਾਸਲ ਕੀਤੀ। ਘਰੇਲੂ ਆਰਥਿਕ ਮੁਸ਼ਕਲਾਂ ਦੇ ਬਾਵਜੂਦ ਉਨ੍ਹਾਂ ਨੇ ਆਪਣੀ ਪੜ੍ਹਾਈ ਜਾਰੀ ਰੱਖੀ ਅਤੇ ਪੰਜਾਬ ਯੂਨੀਵਰਸਿਟੀ, ਚੰਡੀਗੜ੍ਹ ਤੋਂ ਪ੍ਰਾਈਵੇਟ ਉਮੀਦਵਾਰ ਵਜੋਂ ਬੀਏ ਦੀ ਡਿਗਰੀ ਫਸਟ ਡਵੀਜ਼ਨ ਨਾਲ ਪ੍ਰਾਪਤ ਕੀਤੀ।
ਇਸ ਤੋਂ ਵੀ ਵੱਡੀ ਗੱਲ ਇਹ ਹੈ ਕਿ ਆਪਣੇ ਸੰਘਰਸ਼ ਦੇ ਨਾਲ-ਨਾਲ ਉਨ੍ਹਾਂ ਨੇ ਆਪਣੀ ਜੀਵਨ ਸਾਥੀ ਨੂੰ ਵੀ ਉੱਚ ਸਿੱਖਿਆ ਦੇ ਮੌਕੇ ਦਿੱਤੇ, ਜਿਨ੍ਹਾਂ ਨੇ ਬੀ.ਐੱਡ., ਐਮ.ਏ ਪੰਜਾਬੀ, ਐਮ.ਫਿਲ ਅਤੇ ਪੀ.ਐਚ.ਡੀ. ਤੱਕ ਦੀ ਪੜ੍ਹਾਈ ਪੂਰੀ ਕੀਤੀ। ਇਹ ਉਨ੍ਹਾਂ ਦੀ ਸੋਚ ਅਤੇ ਸਹਿਯੋਗੀ ਸੁਭਾਵ ਨੂੰ ਦਰਸਾਉਂਦਾ ਹੈ।
ਗੁਰਜੰਟ ਸਿੰਘ ਨੇ ਪੋਲੀਟੈਕਨਿਕਲ ਕਾਲਜ ਭੀਖੀ ਅਤੇ ਬਰਨਾਲਾ ਦੇ ਰੁੜੇਕੇ ਕਲਾਂ ਵਿੱਚ ਵਰਕਸ਼ਾਪ ਇੰਸਟਰਕਟਰ ਤੋਂ ਲੈ ਕੇ ਸੁਪਰਡੈਂਟ ਤੱਕ ਆਪਣੀਆਂ ਸੇਵਾਵਾਂ ਨਿਭਾਈਆਂ। ਲਗਾਤਾਰ ਮਿਹਨਤ ਅਤੇ ਲਗਨ ਦੇ ਸਦਕਾ ਉਹ ਪੰਜਾਬੀ ਯੂਨੀਵਰਸਿਟੀ ਦੇ ਇੰਜਨੀਅਰਿੰਗ ਕਾਲਜ ਵਿੱਚ ਮਕੈਨਿਕਲ ਵਰਕਸ਼ਾਪ ਟੈਕਨੀਸ਼ੀਅਨ ਵਜੋਂ ਚੁਣੇ ਗਏ।
ਪਰ ਉਨ੍ਹਾਂ ਦਾ ਅਸਲ ਸੁਪਨਾ ਅਜੇ ਵੀ ਅਧੂਰਾ ਸੀ। ਅਧਿਆਪਕ ਬਣਨ ਦੀ ਲਗਨ ਨੇ ਉਨ੍ਹਾਂ ਨੂੰ ਫਿਰ ਪੜ੍ਹਾਈ ਵੱਲ ਮੋੜਿਆ। ਉਨ੍ਹਾਂ ਨੇ ਐਮ.ਏ ਪੰਜਾਬੀ ਕੀਤੀ, ਯੂ.ਜੀ.ਸੀ. ਨੈੱਟ ਪਾਸ ਕੀਤਾ ਅਤੇ ਫਿਰ ਐਮ.ਫਿਲ ਅਤੇ ਪੀ.ਐਚ.ਡੀ. ਦੀ ਡਿਗਰੀ ਪ੍ਰਾਪਤ ਕਰਕੇ ਆਪਣੇ ਸੁਪਨੇ ਨੂੰ ਨਵੀਂ ਉਡਾਨ ਦਿੱਤੀ। ਅੰਤ ਵਿੱਚ, ਪੰਜਾਬ ਦੇ ਮਾਣਯੋਗ ਗਵਰਨਰ ਅਤੇ ਚਾਂਸਲਰ ਤੋਂ ਪੀ.ਐਚ.ਡੀ. ਦੀ ਡਿਗਰੀ ਹਾਸਲ ਕਰਨਾ ਉਨ੍ਹਾਂ ਦੇ ਸੰਘਰਸ਼ ਦਾ ਸੱਚਾ ਇਨਾਮ ਸਾਬਤ ਹੋਇਆ।
ਅੱਜ ਗੁਰਜੰਟ ਸਿੰਘ ਦੀ ਕਹਾਣੀ ਹਰ ਉਸ ਨੌਜਵਾਨ ਲਈ ਪ੍ਰੇਰਣਾ ਹੈ ਜੋ ਮੁਸ਼ਕਲਾਂ ਕਾਰਨ ਆਪਣੇ ਸੁਪਨੇ ਛੱਡ ਦਿੰਦਾ ਹੈ। ਉਨ੍ਹਾਂ ਨੇ ਸਾਬਤ ਕੀਤਾ ਕਿ ਅਸਫਲਤਾ ਅੰਤ ਨਹੀਂ ਹੁੰਦੀ, ਸਗੋਂ ਨਵੀਂ ਸ਼ੁਰੂਆਤ ਦਾ ਦਰਵਾਜ਼ਾ ਹੁੰਦੀ ਹੈ।
About The Author
