ਪੁਲਿਸ ਨੇ ਫਰਜ਼ੀ “ਥਾਣੇਦਾਰ” ਨੂੰ ਕੀਤਾ ਗ੍ਰਿਫਤਾਰ

ਜਲੰਧਰ -29 ਜਨਵਰੀ-ਮਹਿਤਪੁਰ ਪੁਲਿਸ ਨੇ ਨਾਕਾ ਲਗਾ ਕਿ ਇੱਕ ਨਕਲੀ ਪੁਲਿਸ ਅਧਿਕਾਰੀ ਨੂੰ ਗ੍ਰਿਫਤਾਰ ਕੀਤਾ। ਦੋਸ਼ੀ ਇੱਕ ਕਾਲੀ ਸਫਾਰੀ ਐਕਸਯੂਵੀ (ਰਜਿਸਟਰੇਸ਼ਨ ਨੰਬਰ ਪੀਬੀ 10 ਬੀਐਸ 6706) ਚਲਾ ਰਿਹਾ ਸੀ। ਜਿਸ ਦੀ ਪਿਛਲੀ ਵਿੰਡ ਸ਼ੀਲਡ ਉੱਪਰ ਪੰਜਾਬੀ ਵਿੱਚ “ਥਾਣੇਦਾਰ” ਲਿਖਿਆ ਹੋਇਆ ਸੀ। ਇਸ ਬਾਰੇ ਜਾਣਕਾਰੀ ਦਿੰਦੇ ਹੋਏ ਐਸਐਸਪੀ ਹਰਕਮਲ ਪ੍ਰੀਤ ਸਿੰਘ ਨੇ ਕਿਹਾ ਕਿ ਇਹ ਗ੍ਰਿਫਤਾਰੀ ਅਸਮਾਜਿਕ ਤੱਤਾਂ ਅਤੇ ਧੋਖੇਬਾਜਾਂ ਨੂੰ ਬੇਨਕਾਬ ਕਰਨ ਲਈ ਇੱਕ ਵਿਸ਼ੇਸ਼ ਅਭਿਆਨ ਤਹਿਤ ਕੀਤੀ ਗਈ ਹੈ। ਉਹਨਾਂ ਦੱਸਿਆ ਕਿ ਗ੍ਰਿਫਤਾਰ ਕੀਤੇ ਗਏ ਵਿਅਕਤੀ ਦਾ ਨਾਮ ਅੰਸ਼ ਗਿੱਲ ਪੁੱਤਰ ਕਰਮ ਚੰਦ ਨਿਵਾਸੀ ਪਿੰਡ ਉੱਗੀ ਨਕੋਦਰ ਦਾ ਰਹਿਣ ਵਾਲਾ ਹੈ, ਜਿਸ ਨੂੰ ਟੀ ਪੁਆਇੰਟ ਛੋਟੇ ਬਿੱਲੇ, ਮਹਿਤਪੁਰ ਨਾਕੇ ਦੇ ਦੌਰਾਨ ਰੋਕਿਆ ਗਿਆ ਸੀ। ਜਦੋਂ ਉਸਨੂੰ ਰੋਕ ਕੇ ਪੁੱਛਿਆ ਗਿਆ ਕਿ ਉਸ ਦੀ ਗੱਡੀ ਉੱਪਰ ਪੁਲਿਸ ਕਰਮੀ ਦਾ ਸਾਈਨ ਬੋਰਡ ਅਤੇ ਥਾਣੇਦਾਰ ਕਿਉਂ ਲਿਖਿਆ ਹੈ ਤਾਂ ਉਹ ਇਸ ਦਾ ਕੋਈ ਸੰਤੁਸ਼ਟੀ ਜਨਕ ਜਵਾਬ ਨਹੀਂ ਦੇ ਸਕਿਆ। ਜਦੋਂ ਉਸ ਦੀ ਅਤੇ ਗੱਡੀ ਦੀ ਜਾਂਚ ਪੜਤਾਲ ਕੀਤੀ ਗਈ ਤਾਂ ਉਸ ਵਿੱਚੋਂ ਪੰਜਾਬ ਪੁਲਿਸ ਦਾ ਇੱਕ ਫਰਜ਼ੀ ਆਈਡੀ ਕਾਰਡ ਅਤੇ ਕਾਲੇ ਰੰਗ ਦੀ ਖਿਲਾਉਣਾ ਪਿਸਤੌਲ ਬਰਾਮਦ ਕੀਤੀ ਗਈ। ਮੁਢਲੀ ਜਾਂਚ ਤੋਂ ਪਤਾ ਲੱਗ ਕਿ ਉਸ ਨੇ ਪੁਲਿਸ ਵਿੱਚ ਭਰਤੀ ਹੋਣ ਲਈ ਪੇਪਰ ਦਿੱਤਾ ਸੀ ਪ੍ਰੰਤੂ ਪੇਪਰ ਕਲੀਅਰ ਨਹੀਂ ਹੋ ਸਕਿਆ। ਪਰ ਉਹ ਲੋਕਾਂ ਨੂੰ ਇਹ ਦੱਸਦਾ ਰਿਹਾ ਕਿ ਉਸਨੇ ਪੇਪਰ ਪਾਸ ਕਰ ਲਿਆ ਹੈ ਅਤੇ ਆਪਣੇ ਇਸ ਝੂਠ ਦਾ ਦਿਖਾਵਾ ਕਰਨ ਲਈ ਉਸਨੇ ਇੱਕ ਫਰਜ਼ੀ ਆਈਡੀ ਕਾਰਡ ਵੀ ਬਣਵਾ ਲਿਆ। ਆਪਣੇ ਇਸ ਫਰਜ਼ੀ ਥਾਣੇਦਾਰ ਦਾ ਆਈਡੀ ਕਾਰਡ ਅਤੇ ਸਟੀਕਰ ਕਾਰਨ ਹਰ ਟੋਲ ਟੈਕਸ ਤੋਂ ਬਚਦਾ ਰਿਹਾ। ਦੋਸ਼ੀ ਦੇ ਖਿਲਾਫ ਥਾਣਾ ਮਹਿਤਪੁਰ ਵਿੱਚ ਐਫ ਆਈਆਰ ਨੰਬਰ 16 ਮਿਤੀ 27-01-2025 ਵਿੱਚ ਬੀਐਨਐਸ ਅਤੇ ਮੋਟਰ ਵਾਹਨ ਦੀ ਸਬੰਧਤ ਧਾਰਾਵਾਂ ਦੇ ਨਾਲ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਉਹਨਾਂ ਕਿਹਾ ਕਿ ਆਰੋਪੀ ਨੂੰ ਹਿਰਾਸਤ ਵਿੱਚ ਲੈ ਕੇ ਉਸ ਨਾਲ ਜੁੜੀਆਂ ਹੋਰ ਧੋਖਾ ਧੜੀ ਗਤਿਵਿਧੀਆਂ ਦਾ ਪਤਾ ਲਗਾਉਣ ਲਈ ਜਾਂਚ ਕੀਤੀ ਜਾ ਰਹੀ ਹੈ। ਉਹਨਾਂ ਨਾਗਰਿਕਾਂ ਨੂੰ ਵੀ ਅਪੀਲ ਕੀਤੀ ਕਿ ਆਪਣੇ ਆਪ ਨੂੰ ਪੁਲਿਸ ਅਧਿਕਾਰੀ ਦੱਸਣ ਵਾਲੇ ਅਣਜਾਨ ਵਿਅਕਤੀਆਂ ਤੋਂ ਉਹਨਾਂ ਦੇ ਪ੍ਰਮਾਣ ਪੱਤਰ ਰਾਹੀਂ ਪੁਸ਼ਟੀ ਕਰ ਲੈਣੀ ਚਾਹੀਦੀ ਹੈ।