ਪੱਤਰਕਾਰ ਕੁਲਦੀਪ ਸਿੰਘ ਗਰੇਵਾਲ ਦੇ ਬੇਟੇ ਜੋਹਨਦੀਪ ਗਰੇਵਾਲ ਨੇ ਬਾਰਵੀਂ ਵਿੱਚ ਕੀਤਾ ਟਾਪ, ਇਲਾਕੇ ਲਈ ਬਣਿਆ ਮਾਣ ਦਾ ਕਾਰਨ
ਬਰਨਾਲਾ, 13 ਮਈ(ਰਾਕੇਸ਼ ਜੇਠੀ) — ਮਿਹਨਤ, ਲਗਨ ਅਤੇ ਉੱਚੇ ਸੁਪਨੇ ਜਦ ਇਕੱਠੇ ਹੋ ਜਾਣ ਤਾਂ ਕਾਮਯਾਬੀ ਆਪਣੇ ਆਪ ਕਦਮ ਚੁੰਮਦੀ ਹੈ। ਇਸ ਗੱਲ ਨੂੰ ਸੱਚ ਕਰ ਦਿਖਾਇਆ ਹੈ ਬਰਨਾਲਾ ਦੇ ਸੀਨੀਅਰ ਪੱਤਰਕਾਰ ਕੁਲਦੀਪ ਸਿੰਘ ਗਰੇਵਾਲ (ਸੂਬੇਦਾਰ) ਦੇ ਪੁੱਤਰ ਜੋਹਨਦੀਪ ਸਿੰਘ ਗਰੇਵਾਲ ਨੇ, ਜਿਸ ਨੇ ਵਾਈ.ਐਸ. ਸਕੂਲ ਵਿੱਚੋਂ ਬਾਰਵੀਂ ਕਲਾਸ ਵਿੱਚ ਪਹਿਲਾ ਸਥਾਨ ਹਾਸਲ ਕਰਕੇ ਆਪਣੇ ਪਰਿਵਾਰ ਅਤੇ ਇਲਾਕੇ ਦਾ ਨਾਮ ਰੌਸ਼ਨ ਕੀਤਾ ਹੈ।
ਜੋਹਨਦੀਪ ਦੀ ਇਸ ਕਾਮਯਾਬੀ ਨਾਲ ਸਿਰਫ ਪਰਿਵਾਰ ਹੀ ਨਹੀਂ, ਸਗੋਂ ਬਰਨਾਲਾ ਦਾ ਸਮੂਹ ਪੱਤਰਕਾਰ ਭਾਈਚਾਰਾ ਵੀ ਮਾਣ ਮਹਿਸੂਸ ਕਰ ਰਿਹਾ ਹੈ। ਵੱਖ-ਵੱਖ ਪੱਤਰਕਾਰਾਂ ਵੱਲੋਂ ਉਸਨੂੰ ਦਿਲੋਂ ਮੁਬਾਰਕਬਾਦਾਂ ਦਿੱਤੀਆਂ ਗਈਆਂ ਅਤੇ ਉਸਦੀ ਮਿਹਨਤ ਦੀ ਭਰਪੂਰ ਪ੍ਰਸ਼ੰਸਾ ਕੀਤੀ ਗਈ।
ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਜੋਹਨਦੀਪ ਸਿੰਘ ਨੇ ਕਿਹਾ ਕਿ ਉਸਦਾ ਵੱਡਾ ਸੁਪਨਾ ਪੰਜਾਬ ਪੁਲਿਸ ਵਿੱਚ ਡੀਐਸਪੀ ਬਣਨ ਦਾ ਹੈ। ਉਸਨੇ ਕਿਹਾ, “ਇਹ ਸਫਲਤਾ ਮੇਰੇ ਮਾਤਾ-ਪਿਤਾ ਦੀ ਹੌਸਲਾ ਅਫਜ਼ਾਈ, ਅਧਿਆਪਕਾਂ ਦੀ ਰਹਿਨੁਮਾਈ ਅਤੇ ਮੇਰੀ ਲਗਾਤਾਰ ਮਿਹਨਤ ਦਾ ਨਤੀਜਾ ਹੈ। ਮੈਂ ਅੱਗੇ ਵੀ ਇਸੇ ਜਜ਼ਬੇ ਨਾਲ ਮਿਹਨਤ ਕਰਦਾ ਰਹਾਂਗਾ ਤਾਂ ਜੋ ਆਪਣੇ ਸੁਪਨੇ ਨੂੰ ਹਕੀਕਤ ਵਿੱਚ ਬਦਲ ਸਕਾਂ।”
ਇਸ ਮੌਕੇ ਕੁਲਦੀਪ ਸਿੰਘ ਗਰੇਵਾਲ ਨੇ ਬਰਨਾਲਾ ਅਤੇ ਚੰਡੀਗੜ੍ਹ ਦੇ ਸਮੂਹ ਪੱਤਰਕਾਰ ਭਾਈਚਾਰੇ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਉਹਨਾਂ ਨੂੰ ਆਪਣੇ ਪੁੱਤਰ ਦੀ ਇਸ ਉਪਲਬਧੀ ‘ਤੇ ਬੇਹੱਦ ਮਾਣ ਹੈ। ਉਹਨਾਂ ਨੇ ਵਾਈ.ਐਸ. ਸਕੂਲ ਦੀ ਮੈਨੇਜਮੈਂਟ ਅਤੇ ਸਮੂਹ ਅਧਿਆਪਕਾਂ ਦਾ ਵੀ ਖਾਸ ਧੰਨਵਾਦ ਕੀਤਾ, ਜਿਨ੍ਹਾਂ ਨੇ ਬੱਚੇ ਨੂੰ ਬੜੀ ਲਗਨ ਅਤੇ ਸਮਰਪਣ ਨਾਲ ਤਿਆਰ ਕੀਤਾ।
ਇਹ ਕਾਮਯਾਬੀ ਹੋਰ ਵਿਦਿਆਰਥੀਆਂ ਲਈ ਵੀ ਇੱਕ ਪ੍ਰੇਰਣਾ ਹੈ ਕਿ ਜੇ ਮਨ ਵਿੱਚ ਇਰਾਦੇ ਮਜ਼ਬੂਤ ਹੋਣ ਅਤੇ ਮਿਹਨਤ ਸੱਚੀ ਹੋਵੇ, ਤਾਂ ਕੋਈ ਵੀ ਮੰਜ਼ਿਲ ਦੂਰ ਨਹੀਂ ਰਹਿੰਦੀ। ਜੋਹਨਦੀਪ ਗਰੇਵਾਲ ਦੀ ਇਹ ਉਪਲਬਧੀ ਨੌਜਵਾਨਾਂ ਲਈ ਇੱਕ ਰਾਹਦਾਰੀ ਸਾਬਤ ਹੋਵੇਗੀ, ਜੋ ਆਪਣੇ ਸੁਪਨਿਆਂ ਨੂੰ ਪੂਰਾ ਕਰਨ ਦੀ ਲਗਨ ਰੱਖਦੇ ਹਨ।
About The Author
