ਸਿੱਧੂ ਮੂਸੇਵਾਲਾ ਵਾਂਗ ਗੈਂਗਸਟਰ ਗਟਾਰੂ ਦਾ ਕਤਲ
ਜੰਮੂ -21 ਜਨਵਰੀ- ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਦੇ ਕਤਲ ਦੀ ਤਰ੍ਹਾਂ ਜੰਮੂ ‘ਚ ਵੀ ਬਦਮਾਸ਼ਾਂ ਨੇ ਥਾਰ ‘ਚ ਬੈਠੇ ਗੈਂਗਸਟਰ ਗਟਾਰੂ ‘ਤੇ ਗੋਲੀਆਂ ਚਲਾ ਦਿੱਤੀਆਂ। ਜਿਸ ਕਾਰਨ ਉਸ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ।
ਤਿੰਨ ਹਮਲਾਵਰਾਂ ਨੇ ਗੈਂਗਸਟਰ ਸੁਮਿਤ ਜੰਡਿਆਲ ਉਰਫ਼ ਗਟਾਰੂ, ਜੋ ਕਿ ਲਾਲ ਰੰਗ ਦੀ ਥਾਰ ਕਾਰ ਵਿੱਚ ਸਫ਼ਰ ਕਰ ਰਿਹਾ ਸੀ, ‘ਤੇ ਨੇੜਿਓਂ ਚਾਰ ਗੋਲੀਆਂ ਚਲਾਈਆਂ। ਤਿੰਨ ਗੋਲੀਆਂ ਗਟਾਰੂ ਨੂੰ ਲੱਗੀਆਂ। ਇਸ ਕਤਲ ਨੂੰ ਅੰਜਾਮ ਦੇਣ ਤੋਂ ਬਾਅਦ ਤਿੰਨਾਂ ਹਮਲਾਵਰਾਂ ਨੇ ਇੱਕ ਸਕੂਟਰ ਸਵਾਰ ਨੂੰ ਧੱਕਾ ਦੇ ਕੇ ਉਸਦਾ ਸਕੂਟਰ ਖੋਹ ਲਿਆ ਅਤੇ ਫ਼ਰਾਰ ਹੋ ਗਏ। ਗਟਾਰੂ ਕਤਲ ਕੇਸ ਨੂੰ ਮਸ਼ਹੂਰ ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਦੇ ਕਤਲ ਦੀ ਤਰਜ਼ ‘ਤੇ ਅੰਜਾਮ ਦਿੱਤਾ ਗਿਆ ਹੈ। ਘਟਨਾ ਦੇ ਸਮੇਂ ਗਟਾਰੂ ਥਾਰ ਵਿਚ ਇਕੱਲਾ ਸੀ। ਉਸ ਕੋਲ ਪਿਸਤੌਲ ਵੀ ਸੀ, ਪਰ ਉਹ ਬਾਹਰ ਨਹੀਂ ਕੱਢ ਸਕਿਆ। ਇਸ ਕਤਲੇਆਮ ਦੇ ਦੋ ਘੰਟਿਆਂ ਦੇ ਅੰਦਰ ਹੀ ਖੌਫ ਗੈਂਗ ਨੇ ਇੰਟਰਨੈੱਟ ਮੀਡੀਆ ਦੇ ਇੰਸਟਾਗ੍ਰਾਮ ‘ਤੇ ਪੋਸਟ ਕਰਕੇ ਇਸ ਘਟਨਾ ਦੀ ਜ਼ਿੰਮੇਵਾਰੀ ਵੀ ਲਈ ਹੈ। ਪੋਸਟ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਇਸ ਕਤਲੇਆਮ ਨੂੰ ਖੌਫ ਗੈਂਗ ਦੇ ਦੋ ਮੈਂਬਰਾਂ ਅਨਿਲ ਰਾਜਾ ਅਤੇ ਬੰਟੀ ਰਾਜਾ ਨੇ ਅੰਜਾਮ ਦਿੱਤਾ ਹੈ ਅਤੇ ਕਿਹਾ ਹੈ ਕਿ ਅਸੀਂ ਆਪਣੇ ਭਰਾ ਸ਼ੰਨੂ ਦੀ ਮੌਤ ਦਾ ਬਦਲਾ ਲਿਆ ਹੈ।
ਖੌਫ ਗੈਂਗ ਦਾ ਮੈਂਬਰ ਸ਼ੰਨੂ ਪਿਛਲੇ ਸਾਲ ਕਠੂਆ ਜ਼ਿਲ੍ਹੇ ਵਿੱਚ ਪੁਲਿਸ ਨਾਲ ਮੁਕਾਬਲੇ ਵਿੱਚ ਮਾਰਿਆ ਗਿਆ ਸੀ। ਖੌਫ ਗਰੋਹ ਨੂੰ ਸ਼ੱਕ ਸੀ ਕਿ ਇਹ ਗਟਾਰੂ ਹੀ ਸੀ ਜਿਸ ਨੇ ਸ਼ੰਨੂੰ ਬਾਰੇ ਪੁਲਿਸ ਨੂੰ ਸੂਚਿਤ ਕੀਤਾ ਸੀ।
About The Author
